Búið er að draga í gjafabréfaleiknum okkar og hlaut heppin 6 manna fjölskylda gjafabréf á næsta námskeið Íþróttaskólans sem hefst föstudaginn 20. febrúar.

Við óskum þeim til hamingju með gjafabréfið og hlökkum til að hitta þau og hinar fjölskyldurnar í næsta tíma :)

Það eru enn nokkur laus pláss ef fleiri fjölskyldur vilja vera með. Allar nánari upplýsingar er að finna hér á síðunni, einnig er hægt að senda okkur póst á ithrottaskolifjolskyldunnar@gmail.com.

Íþróttaskóli fjölskyldunnar er nú að hefja sitt þriðja starfsár. Í íþróttaskóla fjölskyldunnar er lögð áhersla á að fjölskyldumeðlimir, bæði börn og fullorðnir komi saman til að stunda skemmtilega og fjölbreytta hreyfingu. Eitt aðalmarkmið íþróttaskólans er að stuðla að heilbrigðri samveru fjölskyldumeðlima þar sem gleði og skemmtun í íþróttasalnum er höfð að leiðarljósi. 

Næsta námskeið Íþróttaskólans hefst föstudaginn 20. febrúar og hægt er að velja um annars vegar 6 vikna námskeið eða 12 vikna námskeið. Námskeiðið er ætlað börnum á aldrinum 5-15 ára og foreldrum eða forráðamönnum þeirra. Yngri og eldri systkini eru þó velkomin með í tímana. Námskeiðið verður haldið í Íþróttahúsi Melaskóla, og á ýmsum útivistarsvæðum höfuðborgarinnar, á föstudögum frá klukkan 17:00 til 18:00. Áhersla verður lögð á að börn og fullorðnir taki jafnan þátt í tímunum og að allir þátttakendur fái  notið sín. Á námskeiðinu verður farið í hópefli, leiki, þrautabrautir, þrautir og ratleiki sem henta öllum aldurshópum.

Íþróttaskóli fjölskyldunnar er kjörið tækifæri fyrir börn og fullorðna til þess að stunda fjölbreytta, áhugaverða og skemmtilega hreyfingu saman undir leiðsögn fagfólks. Í nútíma þjóðfélagi er samvera fjölskyldunnar oft af skornum skammti. Með þátttöku í Íþróttaskóla fjölskyldunnar hafa fjölskyldur tækifæri til þess að sameina hreyfingu, samveru og skemmtun í eitt. Eftir tímana væri tilvalið að halda samverunni áfram til dæmis með heimagerðri föstudagspissu og kósýkvöldi. Þannig gengur fjölskyldan samstíga inn í helgina eftir langa vinnuviku.